नगरपालिका कॉम्प्लेक्समधील सार्वजनिक शौचालयाला कुलूप; अतिक्रमणाचा आरोप
वणी | प्रतिनिधी :
वणी शहरातील टिळक चौक परिसरातील नगरपालिका कॉम्प्लेक्समध्ये सार्वजनिक सुविधा आणि ये-जा करण्याच्या मार्गाबाबत गंभीर प्रश्न उपस्थित झाले आहेत. नगरपालिका कॉम्प्लेक्समधील चार ब्लॉक भाडेतत्त्वावर घेतलेल्या डॉक्टर महेश सुर यांनी सार्वजनिक ये-जा करण्याच्या मार्गावर अतिक्रमण केल्याचा आरोप करण्यात येत असून, इतर ब्लॉकधारकांच्या सुविधेसाठी असलेल्या सार्वजनिक शौचालयालाही कुलूप लावल्याचे सांगण्यात येत आहे.
नगरपालिका कॉम्प्लेक्समधील ब्लॉक हे नगरपालिकेच्या मालकीची मालमत्ता असून, संबंधित ब्लॉक भाडेतत्त्वावर देताना नगरपालिका प्रशासनाने निश्चित केलेल्या नियम व अटी लागू असतात. अशा मालमत्तेचा परस्पर हस्तांतरण, दुसऱ्या व्यक्तीला भाड्याने देणे किंवा विक्री करणे यासंदर्भातही नियमांचे पालन आवश्यक असते. मात्र, या कॉम्प्लेक्समध्ये एका व्यक्तीकडून दुसऱ्या व्यक्तीकडे ब्लॉक भाड्याने देणे अथवा हस्तांतरित करण्याच्या प्रकारांबाबत प्रश्न उपस्थित केले जात आहेत.
याच पार्श्वभूमीवर डॉक्टर महेश सुर यांनी चार ब्लॉक घेतल्यानंतर सार्वजनिक ये-जा करण्याच्या मार्गावर अतिक्रमण केल्याचा आरोप आहे. तसेच कॉम्प्लेक्समधील इतर ब्लॉकधारकांच्या सोयीसाठी नगरपालिका प्रशासनाने तयार केलेल्या सार्वजनिक शौचालयाला कथितरीत्या स्वतःचे कुलूप लावण्यात आले आहे.
सार्वजनिक वापरासाठी असलेल्या शौचालयाला एखाद्या खासगी व्यक्तीला कुलूप लावण्याचा अधिकार आहे का? तसेच सार्वजनिक मार्गावर अतिक्रमण झाले असल्यास नगरपालिका प्रशासन याकडे दुर्लक्ष का करीत आहे? असे प्रश्न आता उपस्थित होत आहेत.
मुख्याधिकाऱ्यांसमोर आव्हान
या प्रकरणाची नगरपालिका प्रशासनाने तातडीने पाहणी करून सार्वजनिक शौचालयावरील कुलूप काढावे आणि सर्व ब्लॉकधारकांना त्याचा वापर करण्याची सुविधा उपलब्ध करून द्यावी, अशी मागणी होत आहे. तसेच सार्वजनिक मार्गावरील कथित अतिक्रमण, ब्लॉकच्या भाडेकराराची स्थिती आणि नगरपालिका मालमत्तेच्या हस्तांतरणासंदर्भातील नियमांचे उल्लंघन झाले आहे का, याची चौकशी करण्याची मागणीही करण्यात येत आहे.
आता नगरपालिका मुख्याधिकारी या प्रकरणाची दखल घेऊन सार्वजनिक शौचालय खुले करणार का? कथित अतिक्रमणावर कारवाई करणार का? तसेच नगरपालिका मालमत्तेच्या भाडेकराराची आणि हस्तांतरणाची चौकशी करून दोषींवर कारवाई होणार का, याकडे वणीकरांचे लक्ष लागले आहेया फोटोचा वापार करून बातमीकारिता थांबणेल फोटो तयार करा .
