भाग ४ : वर्ग सुरू असताना लिफ्टचे काम! चौथ्या मजल्यावरील विद्यार्थ्यांच्या सुरक्षेशी खेळ?
मॅकरून स्टुडन्ट अकॅडमी प्रकरण चिघळले; चार मजली इमारतीच्या परवानगीपासून बाथरूमच्या दुरवस्थेपर्यंत अनेक प्रश्न अनुत्तरित
वणी :आबीद हुसेन
मॅकरून स्टुडन्ट अकॅडमी, गंगशेट्टीवार मंगल कार्यालय परिसरातील अपूर्ण इमारतीचा प्रश्न आता केवळ बांधकामापुरता मर्यादित राहिलेला नाही, तर तो थेट विद्यार्थ्यांच्या जीवित सुरक्षेचा प्रश्न बनला आहे. शाळेचे वर्ग सुरू असतानाच इमारतीत लिफ्टचे काम सुरू असल्याची बाब समोर येत असल्याने पालकांमध्ये चिंता व्यक्त होत आहे.
एकीकडे वर्ग सुरू, दुसरीकडे बांधकामाचे काम सुरू—अशा परिस्थितीत एखादा अपघात घडला तर त्याची जबाबदारी नेमकी कोण घेणार? विद्यार्थ्याच्या जीवाला धोका निर्माण झाल्यानंतर प्रशासन जागे होणार का? हा संतप्त सवाल आता उपस्थित होत आहे.
चार मजली इमारत उभी राहिली, तरी नगर परिषद प्रशासन झोपेत?
संबंधित इमारतीचे बांधकाम परवानगीशिवाय झाले असल्याचा आरोप यापूर्वीच चर्चेत आला आहे. जर हे आरोप तथ्यहीन असतील, तर बांधकामाची मंजुरी, नकाशा आणि संबंधित परवानग्या सार्वजनिक करून वणी नगर परिषद प्रशासनाने स्पष्टीकरण द्यावे.
आणि जर आवश्यक परवानग्यांमध्ये त्रुटी असतील, तर चार मजली इमारत उभी राहेपर्यंत नगर परिषद प्रशासनाने नेमके काय केले? बांधकाम सुरू असताना अधिकाऱ्यांच्या निदर्शनास हा प्रकार आला नाही का? नोटीस देऊन फाईल बंद झाली की प्रत्यक्ष कारवाईही झाली?
हा प्रश्न आता थेट नगर परिषद प्रशासनाच्या कार्यपद्धतीवरच बोट ठेवणारा आहे.
मुख्याधिकाऱ्यांच्या भूमिकेवर प्रश्नचिन्ह!
या संपूर्ण प्रकरणात वणी नगर परिषदेच्या मुख्याधिकाऱ्यांची भूमिका काय आहे, याकडे शहराचे लक्ष लागले आहे. इतक्या गंभीर स्वरूपाच्या आरोपांनंतरही प्रशासनाची ठोस कारवाई दिसत नसेल, तर त्यामागे नेमके कारण काय?
शहरात मुख्याधिकाऱ्यांकडून या प्रकरणाकडे अर्थपूर्ण दुर्लक्ष होत असल्याची चर्चा सुरू असल्याचे बोलले जात आहे. मात्र, ही चर्चा खोटी असेल तर प्रशासनाने ती खोडून काढण्यासाठी तातडीने प्रत्यक्ष पाहणी करून कारवाईचा अहवाल जनतेसमोर ठेवणे आवश्यक आहे.
कारवाई का होत नाही? कोणाची वाट पाहिली जात आहे? दुर्घटना घडण्याची?
चौथ्या मजल्यावर वर्ग, बाथरूम मात्र खाली!
या प्रकरणातील आणखी धक्कादायक बाब म्हणजे विद्यार्थ्यांना चौथ्या मजल्यावरून बाथरूमसाठी खाली यावे लागत असल्याची माहिती समोर येत आहे. लहान विद्यार्थ्यांना वारंवार जिन्याने खाली-वर करावे लागत असल्यास त्यांच्या सुरक्षिततेची आणि व्यवस्थेची जबाबदारी कोणाची?
त्यातच शाळेतील बाथरूमची अवस्था अतिशय दयनीय असल्याचेही सांगितले जात आहे. विद्यार्थ्यांसाठी मूलभूत स्वच्छता आणि सुविधा उपलब्ध करून देणे अपेक्षित असताना अशी परिस्थिती असेल तर ही शाळा आहे की विद्यार्थ्यांच्या सोयी-सुरक्षेकडे दुर्लक्ष करणारी व्यवस्था? असा प्रश्न पालकांकडून उपस्थित होणे साहजिक आहे.
कम्प्लिशन सर्टिफिकेट कुठे आहे?
इमारतीला कम्प्लिशन सर्टिफिकेट मिळाले आहे का? इमारत वापरासाठी अधिकृतपणे सुरक्षित घोषित करण्यात आली आहे का? अग्निसुरक्षा व्यवस्था पूर्ण आहे का? लिफ्टचे काम सुरू असताना विद्यार्थ्यांना त्याच इमारतीत प्रवेश कसा दिला जात आहे?
या सर्व प्रश्नांची कागदोपत्री नव्हे तर अधिकृत आणि पारदर्शक उत्तरे आता पालकांना आणि नागरिकांना हवी आहेत.
“दुर्घटना झाल्यावर कारवाई” नको; आधीच निर्णय घ्या!
यापूर्वी अपूर्ण खिडक्या, उघडा लिफ्ट भाग, सुरू असलेले बांधकाम आणि विद्यार्थ्यांच्या सुरक्षेचे प्रश्न उपस्थित झाले आहेत. आता त्यात लिफ्टचे काम सुरू असल्याचा मुद्दा आणि बाथरूमच्या दुरवस्थेची भर पडली आहे.
म्हणूनच प्रशासनाने तातडीने नगर परिषद, शिक्षण विभाग, अग्निशमन विभाग आणि संबंधित तांत्रिक अधिकाऱ्यांची संयुक्त पाहणी करावी. इमारतीच्या परवानग्या, मंजूर नकाशा, बांधकामाची स्थिती, अग्निसुरक्षा, लिफ्टची सुरक्षितता, स्वच्छतागृहे आणि कम्प्लिशन सर्टिफिकेट यांची तपासणी करावी.
कारण उद्या एखादा विद्यार्थी जिन्यावरून पडला, बांधकाम साहित्यामुळे जखमी झाला किंवा लिफ्टच्या कामादरम्यान दुर्घटना घडली, तर चौकशी समिती नेमून विद्यार्थ्याचा गेलेला जीव परत येणार नाही.
त्यामुळे आता सवाल मॅकरून अकॅडमीपुरता नाही—सवाल आहे वणी नगर परिषद प्रशासनाच्या जबाबदारीचा!
चार मजली इमारत, सुरू असलेले लिफ्टचे काम, अपूर्ण बांधकाम आणि दयनीय बाथरूमची अवस्था समोर असताना प्रशासन आणखी किती दिवस शांत राहणार?
विद्यार्थ्यांच्या सुरक्षेशी तडजोड नको; प्रशासनाने तातडीने प्रत्यक्ष पाहणी करून सत्य जनतेसमोर आणावे!
