नाजिया इलाही खान यांच्या कथित आक्षेपार्ह वक्तव्याविरोधात वणी पोलिसांत तक्रार
AIMIM वणी शहराध्यक्ष आसिम हुसेन यांची कायदेशीर कारवाईची मागणी
वणी | प्रतिनिधी
इस्लाम धर्माचे पैगंबर हजरत मोहम्मद (स.अ.व.) तसेच उम्मुल मोमिनीन हजरत बीबी आयशा (र.अ.) यांच्याबाबत कथित आक्षेपार्ह व अपमानास्पद वक्तव्य केल्याचा आरोप करत नाजिया इलाही खान यांच्याविरोधात वणी पोलीस ठाण्यात तक्रार दाखल करण्यात आली आहे. ही तक्रार AIMIM वणी शहराध्यक्ष आसिम हुसेन यांनी पोलीस निरीक्षकांना दिलेल्या निवेदनाद्वारे केली.
निवेदनानुसार, विविध माध्यमे व सोशल मीडियावर प्रसारित झालेल्या कथित वक्तव्यांमुळे मुस्लिम समाजाच्या धार्मिक भावना दुखावल्या गेल्या असून समाजात तीव्र नाराजी आणि असंतोषाचे वातावरण निर्माण झाले आहे. अशा प्रकारच्या वक्तव्यांमुळे सामाजिक सलोखा बिघडण्याची तसेच धार्मिक तणाव निर्माण होण्याची शक्यता असल्याचे निवेदनात नमूद करण्यात आले आहे.
आसिम हुसेन यांनी आपल्या तक्रारीत म्हटले आहे की, संबंधित महिला वारंवार अशा प्रकारची आक्षेपार्ह विधाने करत असल्याचा आरोप असून, यामुळे समाजात द्वेष आणि तणावाचे वातावरण निर्माण होत आहे. त्यामुळे या प्रकरणाची सखोल चौकशी करून संबंधितांवर भारतीय न्याय संहितेतील (BNS) लागू असलेल्या कलमान्वये कठोर कायदेशीर कारवाई करण्यात यावी, अशी मागणी त्यांनी केली आहे.
तसेच भविष्यात कोणत्याही धर्माच्या श्रद्धास्थानांबाबत किंवा धार्मिक व्यक्तिमत्त्वांविषयी आक्षेपार्ह वक्तव्ये होऊ नयेत आणि कायदा व सुव्यवस्था अबाधित राहावी, यासाठी प्रशासनाने तातडीने योग्य ती पावले उचलावीत, अशीही मागणी निवेदनातून करण्यात आली आहे.
